తాను నేను

నువ్వనే తలపు తడిమితే చాలు
మనసు స్తబ్దుగా అయిపోతుంది
ఎదంతా భారంగా
మది అంతా మౌనమై పోతుంది..

ఎటు నుండి ఎటూ కదలని ఆలోచనలు
అలికిడే మరచిన ఙ్ఞాపకాలు ఒకపక్క

అలిసిన గత కాలపు అలజడులు
ఎందుకో ఇంత అలుపు
అంత భారమా నీతో నే పెనవేసుకున్న నా ఆశలు..

ఇంత ఇరుకుగా వున్న
నా ఆలోచనలకు నీ గాలి సోకిన చాలోయ్..
మనసులో వేదనంత దూది పింజలా
జాడ తెలియని ఏ చోటునో పోయి రాలిపోతుంది..

ఉనికిని కోల్పోయిన మనసు
కొత్త కోకను కట్టినట్టు మెరిసిపోతుంది
నీ కళ్ళను తాకిన నా మోములో
ఏ ఆలోచనల నీడలు నిను తాకనంత కొత్తగా..

ఆ దూరాలలో బేలతనం
ఈ దగ్గరలో నిండుతనం
ఏవిటో...ఎక్కడికో ఈ మనం

✍️అరుణిమలు