తాను నేను

నీ నిర్భంధపు ఆలోచనలలో నేనో ఖైదీని
నీ నిర్భంధపు కౌగిలిలో నేనో మధురమైన ఙ్ఞాపకాన్ని..

నీకు బంధీగా మిగిలిన నా మనసు బంధనంలో
నువ్వు లిఖించిన ఓ పెదవి లేఖనాన్ని..

నిన్ను చేరని, చెరగని ఒక భావాన్ని
లిపి లేని నా కంటి బాసకి నువ్వో పాఠకుడివి..

మన మధ్య దూరాలను కొలుద్దామా
తీరాన్ని తాకిన కంటి అలకే తెలుసోయ్ ఆ దూరం..

నా మది పుస్తకంలో నువ్వో శిలాక్షరానివి
కామాలు తప్ప పులి స్టాప్ పడని కథ మనది..

కానీ ఈ దగ్గర తనం ఎప్పుడూ భయపెడుతుంది
ఏ దూర తీరాలలో ఏ అపరిచితులమై ఎదురుపడతామో అని..

నీకు కాలక్షేపమో, ఒక అనుభూతో, ఒక అనుభవమో నేను ఏమో ....
నువ్వు ఎవరనేది మాత్రం నా ఎదురు చూపులే చెప్పక చెబుతాయి..

తెలుసుకో గలిగితే...!!

✍️అరుణిమలు