తాను నేను

అబద్ధంలో‌ బతికేయడం ఎంత‌ బాగుంటుందో
నిజాలను పక్కన పెట్టి

ఆ గడియకు నచ్చినట్టు
ఎవరి మెప్పుతో పనేంటంటు
మనసుకు మాసిక వేసి

నవ్వులను పులిమేసుకొని
సంతోషాన్ని కుమ్మరిస్తూ

ఎవరు‌ మనవారు అనే
లెక్కలతో‌ పనేముందని.. అందరి మనిషిగా బతికేయడం బాగుంటుంది

రేపటితో నాకెందుకని
ఈరోజులో మునిగి తేలుతూ

చిక్కులను చిరాగ్గా చూసి
కొత్త కొత్త చిక్కులను చేర్చే పనిలో మునిగి ఉండటం బాగుంటుంది..

ఎవరు నేను, ఎక్కడ మనం అనే ప్రశ్నలకు విరామం ఇస్తూ..
నువ్వే నేనంటు నమ్మేస్తూ జీవించడం ఇంకా బాగుంది..

నిన్నటిని చూడమంటే, ఎందుకులే అంటు
రేపటిని చూడమంటే కళ్ళు మూసేస్తూ నటించడం బాగుంది..

ఏది నిజమంటే
ఎక్కడ అబద్ధముంది అనే జవాబులను కాలాన్ని అడిగే ఆట బాగుంది..

అబద్ధం బాగుంది నా నవ్వులా
మౌనం బాగుంది నా కటుక రేఖలా

ఇంకా ఉందా..
అరిగిపోని పలక పై
అ నుండి బండీ రా వరకు ఎన్నిసార్లు రాసినా తరగనంత జీవితం ఉంది గజిబిజిగా...

✍️అరుణిమలు