మది మధనం

నిజంగా నిన్ను ప్రేమించే వారిని చూసి ఉండవు..

నీ కోసం సర్దుకుపోవడం

నీ పలుకు కోసం అర్ధించడం

అంటే ప్రేమ కాదు..

నువ్వు ఎవరిని ప్రేమించి ఉండవు..

నిన్ను మెప్పించే వారందరు నీ వారనుకుని

నీ మాట మీరని వారందరు‌ మంచోళ్ళు అనుకున్నావేమో..

వీటిలో ప్రేమ ఎక్కడ ఉంది... అవసరాలు, బంధాలు తప్ప..

తాను నేను

ప్రశాంతంగా ఉన్న మనసులోకి

కొన్ని పరిచయాలు నవ్వుతూ వస్తాయి..

ప్రశ్నలలో ప్రశ్నగా

మనల్ని వదిలి పోతాయి..

మన ప్రపంచంలో

మనం ఆనందంగా ఉండటం

కాలానికి కూడా నచ్చదేమో..

సాఫీగా సాగే జీవితంలోకి

బాటసారులకు ఆతిధ్యం ఇమ్మంటుంది..

అనుభవాలను నేర్పడానికో దేనికో 

పరిచయాలను ఎరగా వేస్తుంది

పరీక్ష పెడుతుంది..

నిన్ను నువ్వు పోగొట్టుకుంటావ

నిన్ను నువ్వు నిలబెట్డుకుంటావ అంటుంది..

బంధాలను గెలవడం అంటే

ఎదుటివారిని లొంగదీయడం కాదు

లొంగిపోవడం కాదు..

ఎవరికి లొంగి గెలవకు

ఎవరిని లొంగదీసి ఓడిపోకు..

నిన్ను నిన్నుగా

స్వీకరించని బంధంలో బంధీ కాకు..

✍️అరుణిమలు