తాను నేను

నిద్రని తలగడకు వదిలేసి
నే ఆలోచనలలో కునుకేసా..
నిదురించిన రేయి కలవరిస్తుంది
కంటికి మింటికి ఈ ఏకదార దేనికని..

రెప్ప పడుతుంటే ఏ పిలుపో వినిపిస్తుంది
ఉన్నావా అంటు..
నిదురను చెరిపేసిన అలజడి ఏదో
ఉలిక్కిపడి లేపింది..

చుట్టూ చీకటి
బాగుంది
నాకు నన్ను కనపడనంత చిక్కదనం..

ఏదో చేజారిందేమో
మనసు ఆరాట పడుతుంది వెతకమంటు..

వదిలి వచ్చేసిన చోటే ఆగి పోయింది ఏమొ వెర్రి మనసు..
ఇంకా నాదే అనే భ్రమలో ఉంది..

ఏ కీచురాళ్ళు చప్పుడు చేసిన బాగుండేది
కాస్త మనసు అటు మళ్ళేది ఏమో..

కునుకుపాటు పడుతుంది మంచం
జో కొట్టి కొట్టి ..

వేల తారలను అలంకరించిన ఆ ఆకాశం మెరిసి పోతుంది చలనం లేకుండా..
అచ్చు నవ్వులను అద్దుకున్న నా మనసులా

✍️అరుణిమలు