తాను నేను

ఎదకో‌ కోరిక ఉంది

ఎదుట పడనంటుంది..

మనసుకో‌ గాయమయ్యింది

మదిలో అదో భాగమయ్యింది..

కోరికలు ఎప్పుడు 

గాయాలనే మిగులుస్తాయి...

మనసుకో‌ తోడు దొరికింది

తీపి గాయాల గేయాలను రాయడానికి..

కథ నాది

కథనం తనది..

✍️అరుణిమలు

తాను నేను

నాతో నీ కన్నా

నీ ఆలోచనలే  ఎక్కువ తోడుగా ఉన్నాయి..

నువ్వో భావంగా

నువ్వో తలపుగా

నువ్వో ఊహగా

నువ్వో ఙ్ఞాపకంగా

నాతో బాగుంటావు..

ఎన్నో ఎన్నో ఆశలు

ఎన్నో కోరికలు

మరెన్నో ఇష్టాలని

బోలెడు కబుర్లను

పోగేసుకుంటుంటా నీ రాక కై ఎదురు చూస్తూ..

ఎప్పుడు నిరాశే మిగిలింది..

ఖాళీ చేతులతో

మనసు భారంగా

కళ్ళ బరువుతోనే వెనుతిరిగాను..

సంతోషం ఇవ్వడం తెలియని వారికి

బాధని ఇవ్వడం మాత్రం బాగా తెలుసు..

అసలు అన్ని తెలిసి

ఎందుకు ఆశిస్తామో

ఎందుకు నిరాశ పడతామో

ఎదను గాయాలు చేసే అవకాశం 

ఎందుకు ఇస్తామో కదా..

ఇష్టమైన చోట కష్టం తేలికగా ఉండేది 

అర్థం చేసుకునే తోడు దొరికినప్పుడు కానీ...

కష్టమే తోడుగా దొరికితే 

ఇక ఇష్టం కూడా ఒక కల్పనే ఏమో..

✍️అరుణిమలు

తాను నేను

నీ దగ్గర ఓడిపోవడం ఇష్టం

నీ ముందర తగ్గడం ఇష్టం

నీ మీద గెలవడం ఇష్టం

నిన్ను గెలుచుకోవడం ఇంకా ఇష్టం

నీతో‌ పంతానికి పోవడం ఇష్టం

నీతో మాటల యుద్దానికి సిద్దం

నీకోసం ఎదురు చూడటం ఇష్టం

నీకోసం ఏడ్వడం ఇష్టం

నీతో గొడవ పడటం ఇష్టం

నీకోసం గొడవ పడటానికి సిద్ధం

నిన్ను తిట్టడం అంటే ఇష్టం

నీతో తిట్టించుకోవడం ఇష్టం

నీ ఆలోచనలలో‌ నన్ను నేను మరచిపోవడం ఇష్టం

నీ మీద అలగడం ఇష్టం..

ఏదైనా ఇష్టమే, నువ్వు నా పక్కన ఉంటే

దేనికైనా సిద్దమే నీకోసం..

నువ్వు అంటే ఎంత ఇష్టమో 

నా అభిమానం అన్న అంతే ఇష్టం నాకు..

నీకోసం తగ్గుతా

నీకు లొంగిపోతా

కానీ నేను తగ్గితేనో

నీకు నచ్చినట్టు ఉంటేనో 

నీ దగ్గర నాకు స్థానం అంటే

మనం అనే మాటకు

నువ్వు ఆంక్షలు పెడితే

నిన్ను మెప్పించడానికి

నన్ను నేను మోసం చేసుకోలేను, నిన్ను మోసం చేయలేను..

ఐనా నేను నీకు పెట్టని ఆంక్షలు

నాకే ఎందుకు ?!

నా అభిమానం లేకపోతే

నేనే ఉండను....అసలు నేను ఎవరిని...నా ఉనికి ఏంటి... జీవశ్చవాన్ని ఐపోతా..

నాకు నువ్వు కావాలి

నా అభిమానం కావాలి

మీ ఇద్దరిలో ఎవరు లేకపోయినా

నేను అసంపూర్ణమే..

✍️అరుణిమలు

తాను నేను

నువ్వో కనిపించని గాయానివి 

ఏమని వర్ణించేది నిన్ను..

ఎవరితోను పంచుకోలేని బాధవి నువ్వు

ఏమని చెప్పుకునేది..

కన్నీటికి మాటలు వచ్చిన బాగుందును

నా పదాలకు అందని వ్యధని వివరించేవి కదా..

గుండెల్లో దాచుకున్న నమ్మకానివి 

ఎద పై తన్ని వెనుతిరిగావు..

నాలో నాకు చోటు లేనంతగా నిన్ను నింపేసుకున్న

నే అందుకోలేనంత ఎత్తులో నిన్ను ఉంచానేమో..

నిజంగానే నా ఆలోచనలకు అందనంత స్థానం నాకు బహుమతిగా ఇచ్చేసావు కదా..

అసలు ఎందుకు నిన్ను నన్ను మించి ప్రేమించానో..

ఏ రోజైనా నవ్వులను పంచావనా

సమయాన్ని ఇచ్చావనా

కష్టాన్ని పంచుకున్నావనా

గుండెల్లో దాచుకున్నావనా..

కారణాలు లేకుండా పెంచుకున్న ప్రేమకు...

ఎన్ని అకారణాలను చూపించావు చివరకి...

నా అభిమానాన్నే గాయ పరిచి

నువ్వు వెళిపోతుంటే...

నీ కోసం బాధ పడనా, 

నేనంతో‌ విలువగా చూసిన మనిషి 

నాకు ఇచ్చిన విలువ చూసి కరిగిపోన..

ఎలా స్పందించాలో

ఏమని‌ రోదించాలో

ఎలా ఊరడించుకోవాలో

ఎలా గతాన్ని వదిలేయాలో

ఏమని నిందించాలో, నిందించుకోవాలో

తెలియని స్థితిలో‌ నిలబెట్టావు కదా..

✍️అరుణిమలు

తాను నేను

ఓదార్చే చోటే 

కన్నీరు ఒలుకుతుంది..

బాధని 

అర్థం చేసుకోని చోట

మౌనమే రాజ్యమేలుతుంది..

విసిగిన చోట

బాధని కూడా చూపించాలని ఉండదు..

ఏ ఓదార్పుని

మనసు కోరుకోదు..

ఇష్టమనే నా తప్పుకు

నువ్వనే కష్టమే కానుకగా దొరికాక..

అంతరంగంలో 

ఆహుతి ఐపోవాలని ఉంది..

కన్నీరు కూడా

బరువుగా ఉంది నేడు..

అక్షరాలకు కూడా

విన్నవించలేను ఎద కోతను..

✍️అరుణిమలు

తాను నేను

కోపంలో ఉన్న

సంతోషంగా ఉన్న

పరధ్యానంగా ఉన్న

అనుకోకుండా

నా పెదవులు పలికే పేరు నువ్వు..

తలపుల్లో నీవే

తల్లడిల్లేది నీకోసమే..

ఊహలో నువ్వే

ఉప్పెనగా ఎగసే బాధవి నువ్వే..

ఎప్పుడు

నాలో నువ్వు ఇంతలా 

ఏకమయ్యావో తెలియదు..

నేనంటు లేనని

నాకంతా నువ్వేనని

ఎందుకు నమ్మేసిందో ఈ మనసు..

నీ నుండి విడిపోవడం అంటే

నా నుండి నేనే దూరమౌతున్నట్టు ఉంది..

అందుకేనేమో

నీకు దూరమవ్వడానికన్నా

నీ ఆలోచనల నుండి

నువ్వనే అలవాటు నుండి బయట పడటానికి

నాతో నేనే తలపడుతున్న..

ఓడిపోతున్న ప్రతీసారీ

మళ్ళీ మళ్ళీ ప్రయత్నం చేస్తూనే ఉన్న..

దారి నీకు తెలిస్తే

మనసు మీద కొట్టి పోకు

మనసులో నుండి వెళ్ళిపో..

✍️అరుణిమలు

తాను నేను

చీకటికి చాలా చెప్పుకుంటా...

దానికి పక్కవారికి పంచే అలవాటు లేదనే ధైర్యంతో..

నిశ్శబ్దంగా ఉన్నచోట

గుండె సడి ఎన్నో చెబుతుంది..

అలుపో....ఆశలో

ఎదలో‌ దాగిన కందకాన్ని తవ్వుతుంది..

ఇన్నాళ్ళు మన మధ్య ఉన్నది అబద్దమా

నువ్విచ్చిన మాట నిజమేనా..

మన దారులు వేరంటు

నా నీడ నన్ను వదిలి పోతుంది నేడు..

గుండెల మీద గుద్ది

నువ్వు కదిలి పోతుంటే...

మనసెందుకో ఇంకా బతికే ఉంది

మరుజన్మ దేనికి ఈ జన్మకు నా మనసుకు తోడు నువ్వనుకున్నందుకా...

నిన్ను ఎంత ఎత్తున నేను ఊహిస్తే దేనికి...

నాకు నువ్వు ఇచ్చిన‌ చోటు నీ పాదాల దగ్గర అని తెలిసాక...

అంతా శూన్యంలా ఉంది

మనం అనే మాట మూగబోయింది..

కత్తి మీద సాము చేస్తుంది ఈ మనసు ఇప్పుడు

గాయాలు తప్ప ఙ్ఞాపకాలు లేవు అక్కడ..

కంటిలో ఏ నలుసు ఉందో

కళ్ళకు‌ అలసట తీరడం లేదు..

అధికారం దండించడానికే కాదు 

దగ్గర తీసుకోవడానికి కూడా ఉండాలి..

కొట్టడానికి తప్ప 

కళ్ళు తుడవ లేని చేతులు దేనికి...

రాత్రి వెళ్ళిపోయింది చీకటిని చెరిపేసి

ఏ కన్నీరుతో కడుగుతున్నావో వేకువ కోసం...

✍️అరుణిమలు