తాను నేను

నొప్పికి, బాధకి రూపానిచ్చేదే కన్నీరు...
నొప్పి కలిగితే నాకోసం వస్తుంది..
బాధ అనిపిస్తే నీకోసం వస్తుంది..

మొండి చేతులకు దండించడమే తెలుసేమో...
చెంపన ఉన్న వెచ్చని చుక్కని తాకడం కష్టమే లే..

నాకోసం ఏనాడు రాని కన్నీరు నీకోసం ఆగనంటుంది..
ఎంత అలుసో దానికి నేనంటే..

కళ్ళల్లో దాచుకున్న నిన్ను ఆ బాధతో పాటే జారవిడిచేయాలని అనుకున్న..
తోడుతున్న కొద్ది గంగ వస్తునే ఉంది కానీ నీ జాడ ఏది...

ఊట బావికే ఊపిరివా నువ్వు
ఇక నిన్ను కదిలించేది ఎలా..

నిన్ను వదిలి పోవాలని వెనుతిరిగాను కానీ...
ఆలోచన ఒక అడుగు ముందుకు వేస్తే,
మనసు ఒకడుగు వెనుకకు లాగేస్తూ ఆఖరుకు ఉన్నచోటనే ఉండిపోయా ఇలా..

నాలో నిన్ను దాచేసుకున్నానో,
నీలో నన్ను పారేసుకున్నానో కానీ
నాకు నిన్ను వదిలే శక్తి లేకుండా పోయింది..

✍️అరుణిమలు