తాను నేను

ఎన్నెన్నో ఆలోచనలు
జరిగిన, జరుగుతున్న వాటికి మధ్యలో
అయోమయాలను సృష్టిస్తూ..

ఎలా మొదలయ్యిందో
తెలియని మన కథలో ఎన్నెన్ని మలుపులో..

ఎలా చెప్పాలో తెలియని
భావాలు ఎన్నో...
ఎందుకిలా తడబడుతున్నాయి అంటే ?
ఏవేవో ప్రశ్నలు నీ అడుగులు సందిస్తున్నాయి..

ఎన్ని సందేహాలను ఇస్తుందో ఈ కాలం
మన దగ్గరతనం లోకానికో సందేహం
మన దూరం మనకో పరీక్ష..

ఎలా ఉందామంటే
అలా ఉండనివ్వని మనసు
ఎలా ఉండకూడదంటే
అలాగే ఉండమనే లోకం..

విప్పి చెప్పడానికి ఏం లేదు కానీ
మదిలో వాదోపవాదాలు ఎన్నో..

నిన్ను గెలుచుకోవడానికి రాలేదు
నిన్ను గెలిపించుకోవాలనే తపనే నాది..

నిన్ను పొందాలనే కాంక్ష లేదు
నీలో నేననే ఒక చెదరని ఙ్ఞాపకాన్ని వదిలేయాలని కోరిక తప్ప..

నేను నీ దానినే ఎప్పటికి
నువ్వు మాత్రం నా భావానివే ఎన్నటికి...

ఏదో చెప్పాలని ఉందోయ్
కళ్ళ నిండిన గంగ సాక్షిగా
కానీ అభిమానం అడ్డుగా నిలబడింది..

✍️అరుణిమలు