తాను నేను

నా మౌనం నీకు మాత్రమే వేసిన శిక్ష కాదు

నీతో పాటు నాకు సగభాగం ఉంది అందులో..

నా ఆంక్షలలో నిన్ను ఖైదుని చేయలేదు

నా ఆలోచనలు బంధీలయ్యాయి నీలో..

నిన్ను చేరని నా తలపులు

నా వద్దే అలిగి కూర్చున్నాయి..

ఎన్నో చెప్పాలని ఉంది కానీ

పెదవికి ఎందుకో ఈ బింకం..

మాటలు మరచిన మనసుకు

నీ ఙ్ఞాపకాలే ఓదార్పు..

ఎందుకో...

ఈ కాలానికి పరీక్షలు పెట్టడం అంటే

ఇంత ఇష్టం..

ఇద్దరి మధ్య దూరమనే గిరి గీసి

చోద్యం చూస్తుంది..

లెక్క పెడుతున్న చుక్కలు లెక్క తేలడం లేదు

నేను నీకు దూరంగా జరిగిన ఈ రోజులు గడవడం లేదు..

కలిసిపొమ్మని ఎద నస పెడుతుంది 

కానీ....తీరానికి చెరో వేపు ఉన్న తీరాలమని

కలవడం కుదరదని దానికేం తెలుసు..

✍️అరుణిమలు