తాను నేను

కలలా వచ్చావు కథలా మిగిలావు
కల్పనా ఇదంటే..
వాస్తవంలో విషపు చుక్కవై అడుగడుగునా కనిపిస్తున్నావు..

ఆలోచనలలో వెనక్కి అడుగులు
వేసిన ప్రతీసారీ..
తడబడిన అడుగుల గురుతులు
వెక్కిరిస్తున్నాయి...

భావాలను కదిలించావు
నీపై భ్రమలను తొలగించావేమో
ఇదిగో... ఇలా అక్షరాలకు భానిసనై పోయాను

మరచిపోయేందుకు ఏ మంత్రమైన
ఉంటే బాగుండేది అనిపిస్తుంది..

వెంటాడే నీ నీడను చూసి
వడివడిగా పడే అడుగులకు కూడా
నీ జ్ఞాపకాలు ముళ్లై గాయాలు చేస్తున్నాయి..

ఏకాంతమనే శాపం మనసుకు ఇచ్చావు
నమ్మకాన్ని గాయాలు చేసి
వేడుక చూస్తున్నావు..

చెలిమి అనే పదానికి చెదలు పట్టించావేమో
మరో నీడను కూడా నమ్మడానికి
మనసు జంకుతునే ఉంది..

✍️అరుణిమలు